Banner
Banner

 

काठमाडौं । अभिनेत्री काजोलले दिएको ‘नेताको पढाइ’ भन्ने अभिव्यक्तिलाई लिएर सामाजिक सञ्जालमा बहस सुरु भएको छ । धेरै प्रयोगकर्ताले उनलाई ट्रोल गर्न थालेका छन् । विवाद बढ्दै गएपछि काजोलले आफ्नो बयानमा स्पष्टीकरण दिएकी छिन् ।

उनले ट्वीटरमा लेखेकी छन्, ‘मैले शिक्षा र यसको महत्त्वबारे कुरा गरिरहेकी थिएँ । कुनै पनि नेतालाई बदनाम गर्ने मेरो उद्देश्य थिएन । देशलाई सही बाटोमा लैजाने केही महान नेताहरू छन् ।’

अभिनेत्री काजोल आफ्नो आगामी शो ‘द ट्रायल’ को बारेमा एक मिडिया संस्थासँग कुरा गरिरहेकी थिइन् । यस क्रममा उनले भारतको भविष्य र नेताहरूको शिक्षाको बारेमा बयान दिइन्।

उनको भनाइपछि नै सामाजिक सञ्जालमा बहस सुरु भएको छ । कतिपयले उनको आलोचना गरेका छन् भने कसैले समर्थन गरेका छन् ।

मिडिया इन्स्टिच्युटसँगको कुराकानीमा काजोलले भनिन्, ‘विशेषगरी भारतजस्तो देशमा परिवर्तनको गति निकै सुस्त छ किनभने हामी अझै पनि हाम्रा परम्परामा अड्किएका छौं । र यसको तार हाम्रो शिक्षा संग जोडिएको छ।’

उनले थप भनिन्, ‘हामीसँग शैक्षिक पृष्ठभूमि नभएका नेता छन् । मलाई माफ गर्नुहोस् तर मैले भन्नै पर्छ, हामीमाथि शासन गर्ने धेरै नेताहरूसँग शिक्षाबाट आउने दृष्टिकोण छैन। मलाई लाग्छ कि शिक्षाले कम्तिमा अर्को दृष्टिकोण हेर्ने मौका दिन्छ।’